الاثنين، 19 يناير، 2009

الفصل الخامس

اجلس فى تريانون وحيدا امامى فنجانى الثالث من القهوة " ده انا المفروض اجيب قصريه بدل مادخل الحمام كل شويه على القهوة اللى انا عمال اشرب فيها دى " ... اعاود النظر الى هاتفى المحمول مستكشفا الوقت " اتاخرت جودى .. بس عادى لازم تعمل كده و تسيبنى قاعد ملطوع زى ما انا اتاخرت عليها " ... اتذكر ايامى معها .. كنا فى نفس المدرسه .. مدرسه للغات قبل ان تصبح مدارس اللغات موضه قديمه و تحل محلها مدارس الدبلوما الامريكيه و شهاده IGC البريطانيه .. كانت مصريه ابا امريكيه اما .. بعد وفاه والدتها اتى بها ابيها الى مصر لتكمل تعليمها " اصله كان خايف عليا اطلع منحرفه زى البنات الامريكان ... بس هو سابنى عند جدتى و رجع هو للمنحرفيين فى امريكا ... و ادينى طلعت برضه منحرفه مانابنى الا خناقتى مع آنا " كنت دائما اضحك كلما سمعت منها كلمه آنا التى تشير بها الى جدتها .... كانت لا تستطيع الكلام باللغه العربيه فى بدايه الامر و لكنها تدريجيا بدأت فى تعلمها ... اضحك و انا اتذكر كيف كان نطقها للكلمات فى حصه اللغه العربيه ... " بتضحك على ايه كده و فاشخ بؤك أوى " ياتينى صوتها من امامى و انظر لها قائلا " كنت بافتكرت و انتى بتهتى فى الكلام ايام ماكنتى لسه جايه " ... " ما انت فايق عليا بروح امك ... " و تتبع هذا بحركه اشتهر بها الاسكندريون فاضحك " اوعى بس تاخديها على صدرك لحسن تتعبى " ... تتبع جملتى بمزيد من الشتائم التى تحاول بها تاكيد امتلاكها لناصيه اللغه فيزيد ضحكى لانى انا نفسى افعل هذا عندما اكون مع بعض الناس محاولا نفى فكره انى " فافى و بتاع مامى و دادى " التى ياخذوها عندما يتعاملون معى فى بعض المواقف .... " كفايه قباحه .. ايه اللى اخرك ... انا مش قايلك انى هاستناكى بعد ساعه تيجى انتى بعد ساعتين .... " تجيبنى " اصل الطريق كان زحمه " ... " انتى هاتستعبطى زحمه ايه من المهندسين لجامعه الدول دى اللى تخليكى تاخدى ساعتين " ... ترد قائله " ما انا استنيتك الصبح ... اشمعنى انتى ما تترزعش شويه و تستنانى .. ايه وراك الديوان " ..... " و الله يا بنتى الواد سمير كان جايب حشيش ماتعرفيش مهروش عليه كيميا ولا ايه ... احنا شربنا من هنا و اتقلبنا من هنا .. ماحستيش غير لما اتزنقت و كنت عايز ادخل الحمام " ... تسالنى " و يا ترى كان مين فى قعده الانس بتاعت امبارح ؟ " اجيبها " ناس كتير ماعرفهاش .. بس لما صحيت ماكانش فى غير سمير و ليلى و جاسمين .. و التلاته كانوا مفخدين موت خصوصا جاسمين اللى كانت نايمه نص جسمها على الكرسى و النص التانى على الارض " ..... ترد على و تظهر بعض الغيرة فى صوتها " و يا ترى انتو بأه كنتوا نايمين جنب بعض ولا على بعض ولا نايمين ازاى " ... انظر لها مبتسما " لا والله انا كنت نايم على كرسى لوحدى و هما الناحيه التانيه " ... " ماشى يا هانى .. و عموما انت حر .. تنام لوحدك .. تنام معاها .. ان شاالله تنام مع سمير .. انا بس كنت عايزة اعرف ايه اللى اخرك " .... اقول لها ضاحكا " انام لوحدى ماشى .. معاها جايز مع انها مش تييبى .. انما مع سمير ما ينفعش ... اصلى ماليش فى الخشن " ... كانت دائما علاقتى بجودى علاقه معقده من النوع الذى يطلق عليه الاجانب on / off و لكننا كنا دائما اصدقاء الا باستثناء بعض الاوقات القليله عندما يصاب احدنا بالجنون و يرتبط بشخص آخر يرفض هذه العلاقه بينى و بينها و لكننا لا نلبث ان نعود الى بعضنا البعض ... كانت نشاتنا متماثله من اوجه كثيرة .. والدتها متوفيه و والدها بالخارج الا فى اوقات الاجازات و " العطلات الرسميه " كما كان يحلو لها السخريه منه دائما .. و انا والدى متوفى و والدتى دائما مشغوله بالاجتماعيات التى تواظب عليها بصفتها سيده مجتمع ... هى تعيش مع جدتها و لكن نتيجه لكبر سن جدتها كانت فعليا تعيش وحدها و تفعل مابدا لها مثلى تماما ... شخصياتنا متقاربه فى كثير من الاشياء ..... " انا شوفتك من كام يوم ماشى مع الواد اللى كان معانا فى الجامعه ده ... اسمه مش فاكراه .... الواد الابيضانى بتاع المنصورة ده اللى كان غاوى يقول شعر .. كنتوا ماشيين على رجليكوا و ندهت عليك بس انت ماسمعتنيش و لقيتكوا بتركبوا تاكسى بعد كده .. الا عربيتك كانت فين ؟ " تقطع استرسالى فى افكارى بهذا السؤال المفاجئ ... كنت دائما ارغب فى تركها بعيدا عن علاقتى بقاسم و لكن يبدو انه لا شئ يظل سرا الى الابد .. انظر لها محاولا ان احبك الكذبه التى انا على وشك ان اقولها ردا على سؤالها الشائك " اه .. قصدك قاسم ... ده انا كنت معاه و عربيته اتعطلت فاخدنا تاكسى " ... " بس يا بنى انت مش قلتلى انه قاسم ساب شغله فى البنك و استشيخ ... ايه اللى لمك عليه تانى و انت ما شاء الله كنت لسه بتحشش و بايت مع جاسمين امبارح " ... احس بمزيد من التورط لاضطرارى لمزيد من الكذب " ده اتصل بيا و كان عايز منى خدمه صغيره فقلت اقابله بالمرة " ... " غريبه ... ماكنتش اتوقع ان قاسم ممكن يتقلب للشيخ قاسم .. خصوصا بعد ماتخرج بامتياز و اشتغل فى بنك اسثمارى محدش يحلم انه يعدى ادامه اصلا " .... اقول لها ضاحكا " ما انتى كمان اتخرجتى بامتياز .. عملتى بيها ايه يعنى ... طول الليل لف و صياعه و تشوفى الاسهم بتاعتك على النت و طول النهار نايمه " ... تنظر ليا فى غيظ " ماهو حسدك ده اللى فقرنى و الاسهم بتاعتى بأت ماتساويش قرش دلوقتى ... و بعدين هو اتخرج بامتياز عشان هو كان Book Worm انما انا اتخرجت بامتياز عشان انا كنت Book Worm Bitch و بكده فى فرق بينا " ... اضحك و انا اقول لها " الفرق يا فى الشعر يا فى ..... ، و بما انى ماكنتش زى قاسم و مانفعش اكون زيك فخرجت بجيد فى الاخر " ... تقول لى بتحفز " يعنى مانفعش تكون زيى دى .. احنا هنقل ادبنا ولا ايه " .. اجيبها " يا ستى ولا قله ادب ولا حاجه الفكره انى فشلت ... و عشان ماتزعليش .. انا كان نفسى اكون زيك بس ما عرفتش ... مبسوطه كده " .. " ايوة كده اتعدل فى كلامك ... مش تقولى زيك و ماعرفش ايه " ... تعاود اسئلتها " بمناسبه الشغل ... انا كنت مع صفاء من كام يوم و عرفت انك بتغيب كتير و مش مهتم بشغلك ... ايه ... لحقت تزهق منه ولا ايه " ... المزيد من الكذب " مش كده .. بس الفكرة انى كنت فعلا زهقان ليا مده .. بس خلاص دلوقتى .. " .. " طيب ماتيجى نطلع شرم يومين نغير جو و نفوق و نرجع تانى " ... اخيرا انتهت من اسئلتها " ماشى ... بس اظبط دنيتى الاول و بعدين نطلع " و قبل ان تسال المزيد من الاسئله " ما تيجى نقوم ناكل لحسن انا جعان كلب " ... هى باستغراب " كلب ؟؟ " .. اضحك قائلا " هى لسه ماوصلتش عندك فى القاموس ... كلب دى البديل الجديد لكلمه طحن " .. تجاوبنى " ماشى يا عم العلامه .. بس انت اللى هتدفع عشان تبطل تشرب حشيش و تجوع بعده " ... " ماشى يا مزة " ... و ننطلق فى طريقنا ....... يتبع

هناك 18 تعليقًا:

ستيته حسب الله الحمش يقول...

اولا الف مبروك وعقبال ما تكمل ولعلمك انا مشدودة جدا ليها
الواد هاني ده انا شفت زيه كتير في الحياة متلخبطين وفاقدين الطريق وبعد ما نكون مستنين انهم يروحوا شرطة الآداب يرسى الموضوع على تطرف وأمن دولة وهم كده كده في الحالتين متطرفين لأنهم فقدوا القدوة وفقدوا الأتجاه

وشوشه في ودنك ولو مش عاوز تنشرها انت حر تماما المهم انا عارفه ان التعليق وصل لك
اي مبدع على وجه الارض لا يلزمه تعليق حد على اسلوبه او اداءه لأن دي حاجات نابعة من القلب
لكن ياعزيزي "وانت فعلا عزيز جدا" لو استخدمت ايحاءات لتوصيل فكرتك بدل كلام صريح ساعات يصدم وساعات بيجيب قيء صدقني ها توصل للناس اسرع
اي مبدع حر تماما فيما يكتب واللي عاجبه يقرا واللي مش عاجبه يدور في حته تانية بس برضه كل مبدع يحب الناس تقرا ليه ومحدش بيكتب لنفسه
وبعدين وصل كل اللي انت عاوزه بس بتقوى لله ومش حب او كره في أي رأي ولا انت ايه رأيك؟

عاوزة اعرف الواد قاسم عمل ايه؟
عاوزة اجيب اخرت هاني ده
حلو قوي اسم هاني ده موحي قوي هع هع هع
تمنياتي بالتوفيق وتخلص الرواية

Che يقول...

عمتى ستيته
اولا الله يبارك فيكى
ثانيا انا مش هاحرق القصه بس انا عاجبنى جدا انك بتفكرى فى اتجاه و القصه هتمشى فى اتجاه تانى خالص
و اكيد اى حاجه انتى تبعتيها لازم انشرها لالف سبب ... و انا هارد عليكى لانه حق ابداء الراى مكفول زى ما حق الرد مكفول
انا مش هاقول مدونتى و اللى مش عاجبه لان ده مش من طبعى و عيب انه يكون فى حد مهتم كفايه انه يكتب رد محترم اقوم اطلع انا قليل الذوق .. فما بالك اذا كان الحد ده مش حد .. لا دى عمتى ستيته على سن و رمح
بالنسبه لاستخدامى كلام صريح بدلا من الايحاءات فده لانى باعتقد عصر الايحاءات انتهى ... انا ماحاولتش استخدم كلام صريح زياده عن اللزوم و عشان كده هتلاقى انى باستخدم نقط كتير مكان الكلام اللى انا مش عايز اكتبه عشان انا عامل حساب النقطه اللى انتى بتتكلمى عليها .. انا شايف و جايز اكون غلط فى وجهه نظرى انى استخدمت كلام كلنا بنقوله بشكل او بآخر و ساعات بنقول اكتر منه
و طبعا انا فاهم قصدك ايه بكلمه حب او كره فى اى رأى آخر انما انا والله مش فى دماغى النقطه دى و انا باكتب
و اذا كنت سببتلك اى احساس مش لطيف و انتى بتقرى انا اسف جدا عليه و هاحاول اخد بالى المرة الجايه لانه فى الاخر انا مش باكتب عشان اعجب نفسى او اقرى لنفسى
ملاحظه اخيرة .. كل الروايات اللى عملت حراك فى الحياه الادبيه عندنا فى السنين الاخيره احتوت على كلام صريح و صادم اكتر من اللى انا كاتبه .. بدايه من عماره يعقوبيان مرورا بشيكاغو و تغريده البجعه و نهر السماء و الروايات مالهاش اخر
سعيد بتعليقك جدا يا عمتى و بالنسبه لقاسم الفصل الجاى هيكون خاص بيه
و بالنسبه لاسم هانى انا والله ماكانش قصدى اللى فى دماغك لو كان اللى فى دماغك هو اللى فى دماغى كان مجرد صدفه لكن انتى دورتى على اسقاط مباشر ليه و صادفت كده
و يا رب الحق اخلص الروايه
تحياتى ليكى يا عمتى

ستيته حسب الله الحمش يقول...

على فكرة في مدونة ها تعجبك
http://yawmiyat3aness.blogspot.com/
هي نفوخها يسار شوية بس كلام البنت يخليك في بعض قصصها لا تملك نفسك من انك تلاقي نفسك جوا الحدوتة انا عارفه انها ها تعجبك
ابقى قول لي رأيك

على فكرة عمارة يعقوبيان وشيكاغو وانا بقرأهم بقيت اقول نفسي افهم الراجل الدكتور المحترم ده بيكتب الحاجات دي ليه .. هي ليست في وسط احداث وحذفها لن يخل بالقصة ابدا ولا بستمتاع الناس
بس تقريبا فيه ناس عارفة ان عدد مش قليل للأسف ها يقرأ علشان الكام صفحة دول وبقية الرواية مش ها يهتموا يفهموا منها شيء .. يعني اشك ان السبب كان الأبداع
انا مقصدتش حاجة ياشرير انت اللي بتسقط اللي انت عاوزة ومتجبش سيرة الاسقاط ولا السقوط معايا هع هع هع

Che يقول...

عمتى ستيته
طبعا مدونه يوميات عانس عندى و متابعاها بس مابعرفش اكتب كومنتات عليها .. ليه مش عارف زى ماتكون خاصيه الكومنت ملغيه من على المدونه دى مع ان فى ناس بتكتب كومنتات عادى
و بالنسبه للروايتين بتوع الاسوانى فاحنا ممكن نحطهم على جنب .. و نرجع شويه لروايات نجيب محفوظ ( فى طبعتها الاصليه مش الطبعه المنقحه عشان تناسب الاداب العامه ) .. و ممكن ترجعى لوا اكتر و تقرى شعر ابو نواس و بشار ابن برد ... و ينفع ترجعى لورا اكتر كمان و تقرى النسخه الاصليه لالف ليله و ليله ( اللى انا عندى نسخه اصليه منها من ابداع المطبعه البولاقيه سنه 1932 ) .. و الامثله اكتر من افتكرها
و بعدين جايز اكون انا الشرير و عملت الاسقاط بس من غير قصد اللهم الا الخلفيه المشتركه مابينا فى الكليه و القسم بس والله ما كان قصدى
و عندك حق الواحد ماينفعش يتكلم عن الاسقاط و السقوط فى ايام الامتحانات دى اللى ما يعم بيها الا ربنا
شكرا عشان انتى ماخصمتليش لما مضيت متاخر فى دفتر المدونه بتاعتك
بس اصلى نفسى ربنا يسهلى و انزل بكره الفصل السادس و السابع عشان اعرف رايك فيهم ايه

سمكه واحده يقول...

انا قريت البوست ده بس بصراحه حلوه
بس بعترض علي انهي كلمه بقي اللي الاسكندرنيه مشهورين بيها سيتك ؟
انهي حضرتك بقي واشمعني الاسكندرنيه لو كانت كلمه قبيحه اكيد في مصر كلها احب اعرف يعني هه
متقول
مترد متكلم
خايف من ايه
ناس تخاف متختشيش
اسلوبك لذيذ في الكتابه بجد بغض النظر عن الاسكندرنيه واللي مشهورين بيها دي كلمه عندنا مش عيب يعني ولا قبيحه ولا حاجه بنقولها لما بنتخض وعادي جدا لانها مش زي ما في دماغك علي فكره زي يالهوي بظبط
تحياتي

Che يقول...

سمكه
كده انا عرفت سر اسم سمكه ... و اسكندريه اجدع ناس و اللى يقول غير كده يبقى مابيفهمش ... على فكرة انا مش اسكندرانى بس اظن انى اكتسبت الجنسيه الاسكندرانيه من كتر مارحتها و قعدت فيها ... قعدت فى غيط العنب ليالى و قضيت ايام فى ابو خروف و نمت على البحر عدل فى ابو قير و كنت عايز ادخل العمارة المسكونه فى رشدى بس ماعرفتش ادخلها عشان الحيطه اللى مبنيه مكان مدخلها
و بعدين انا ماقلتش كلمه ، لانى عارف ان الكلمه دى مش عيب فى اسكندريه ... انا قلت حركه .. و الحركه دى عباره عن سحب هوا و اخراجه مرة تانيه من المناخير ... اقول تانى ولا عرفتيها ... هههه
و بعدين انا مفيش فى دماغى حاجه ... اللى فى دماغى باقوله على طول
عمال اقلك نورتينى لغايه ما انا حاسس انى هادفع دم قلبى فى الكهربا بس مش مشكله ... سمكه هانم مش كل يوم عندنا
مستنى تعليقات تانيه منك

kemet يقول...

السلام عليكم ورحمة الله وبركاته

مش عارفه اقولك ايه صحيح ف الاول ضايقتني بعض الكلمات بس عيشتني الجو اللي تقصده الروايه حسيت اني بسمع وبشوف اللي بيحصل ودا من رأي نجاح ليك انك تقدر تخلي القارئ شايف داشيئ رائع
مستنية الباقي

تحياتي
الي اللقاء

Che يقول...

Kemet
اهلا بيكى عندى فى الرايه لاول مرة
بالنسبه لمساله الكلمات و الالفاظ اللى فى الراويه فانا والله باحاول اخليها مش جارحه على اد ماقدر لانى فى الاخر مش كاتبها عشان اعذبكوا و انتى بتقرى بس الفكرة انى باحاول ماكونش سطحى أوى ولا من اتباع مدرسه بلزاك أوى .. باحاول اوصف من غير تطويل و من غير ملل
سعيد انك عايشه الجو بتاع الروايه و سعيد اكتر انك مستنيه تعرفى الباقى
نورتينى بتعليقك

hasona يقول...

ألف مبروك
لنا عودة

Che يقول...

hasona
الله يبارك فيك و انا شخصيا بانتظار العوده
نورتنى

مثلية تبحث عن ذاتها يقول...

انا قأت كل الفصول اسلوبك سلس و مصداقيه القصه نسبتها كبيره جدا في انتظار باقيه الاجزاء
تحياتي

Che يقول...

مثية تبحث عن ذاتها
لنل سعيد ان الروايه عجابكى و شكرا على مجاملتك الرقيقه
باحاول انى اخلص الروايه بس المشكله انه مفيش غير 3 فصول و الفصل الاخير بس فى دماغى و الباقى لسه
نورتينى و مستنى زيارتك دايما

حروف (دلو مرة ثانية وجرح ثاني سابقا) يقول...

ممممممممممم يا بابا دة كل ناس واغلبهم بيعملوها وهما نيمين وبتحصل في وضع الخناق بس مش عمال علي بطال



غيط العنب يعني كرموز يعني الحشيش ومخدرات يعني الصياعه علي حق هههههههههههه وسمعني سلام الصلح خير يابني دة انا اللي اسمي اسكندرانيه معرفش فين غيط العنب واسمع بس عنها
وشوبش يا اللي مش هنا ههههههههههههه
انا معرفش حاسه ليه اني عايزة اتخانق معاك يا عم انت مع اني مش بعرف اتخانق اصلا بس حاخد كورس وارجعللك انتطرونا هههههههههههههه
باي باي

Che يقول...

حروف العسوله
طبعا انا عارف غيط العنب و شهرته و اجدع ناس فى كرموز يعنى الخناقات و الفتونه و الرجوله اللى على حق
و معلش يا حروف انك ماتعرفيش غيط العنب ... هنا بأه فرق الخبره يا جميل
نورتينى و هاحاول اكمل الروايه

سهر يقول...

مبروك
مش قدرت اكمل النص طويل

Che يقول...

سهر
اولا اهلا بيكى لاول مره
و ثانيا الله يبارك فيكى
و ثالثا كملى وقت ماتفضى
نورتينى يا جميل

E73 يقول...

آسفة لكن مقدرتش أكمل حتى البوست ده
الاسلوب مش اسلوبي خالص

عموما ربنا يهدينا جميعا

Che يقول...

E73
ولا يهمك .. و ماتخافيش عليا ، انا هاقدر اعدى صدمه انك مش هتكلمى قرايه و هاحاول اقاوم شعور الحزن اللى مسيطر عليا و يمكن يخلينى انتحر انك مش عاجباكى الروايه
و آمين يا رب